本月食事

緻好茶館
星期五晚，金鍾開會完畢，抽起條筋要食西餐。八點幾九點，過Press Room搏一搏，要等二十分鐘，咁算囉。行過去Al Dente，門口排到非法集會咁樣，ok fine，走囉。本諗住返星街再食一次果間沒名字的日式燒，但實在太餓，行落泥街求其有位就入。緻好好多位。又唔係唔好食又唔係貴，唔知點解會咁多位。食過午餐，家常菜，勝在材料靚，home made菜肉雲吞都好味。叫左菜肉雲吞、煎銀雪魚、雲耳炒蜜豆及蛋白薑粒炒飯。唯獨係蛋白薑粒炒飯差D，唔會再叫。哩間野唔靚裝修的，不過靜靜地又唔係坐得唔舒服，可以再去。

Cafe O
星期六晚，十二點幾嘅中環，二十世紀少年完畢，唔想食茶餐聽或魚旦粉之類。上左車先呻笨點解唔行去flying pan。行過駱克道，有kabab有thai，都是唔想食的。盧押道cafe O囉咁。收一點，有pasta, pizza同 all day breakfast。叫左個pizza同一份sandwich。個mushroom pizza出奇好食。夜媽媽有靚pizza食，可以再去。

Press Room
話去好耐，順便過classified買個honey tasting pack。卒之星期日去食左個brunch。先叫左egg royale同black truffle fettucine。前者係其實係egg benedict加smoke salmon加包，哩D穩陣，個味唔會好錯，turn out係穩陣地好食囉。後者未食齋聞都香到死，食落當然好好味。不過brunch份量偏細，食完要再叫。後來叫多左Tarte à l’Orange同waffles，兩個都以後唔洗左叫。早知要Crème Caramel。我後面坐左一檯三個女人。所謂三個女人一個墟，而當三個女人都係講國語的時後，就更加令人難堪。吱喳到我都無心機繼續坐，食完就埋單走。一路行落中環，H&M, Comme, eYe, Hoods, MMM, 基本上一個崩都無跌（响nike買左件sweater唔計），非常好。點知落到188就買左崖の上のポニョ手稿......

金城茶餐廳
筲箕灣東大街爆好食茶餐廳，係我的同事帶我去的。炒粉麵飯好好鑊氣，首推斑腩炒河、摩囉雞飯同焗豬扒飯。勁大碟的，各位小心叫。

D17
well... 係因為有人生日先會去。係上樓的，食西式海鮮的。野係幾好食，但本人覺得熟嘅好過生的。但我都好俾面食左兩隻生蠔。我本來係唔食生蠔的。又OK喎。除左一般的cocktail sauce，佢仲有個話係自己研發嘅thai sauce，有香茅味的，幾好味。生嘅有深海龍蝦同蝦，佢地話深海龍蝦好喎。熟嘅有聖子、大蜆，兩個都好好味。仲有個溫泉蛋都good。俾佢吹漲的有shooter式mushroom soup。一小cup shooter咁嘅size，cappuccino d泡咁嘅texture，但又真係mushroom soup咁嘅味。問果度D人，話係特登㗎喎，係份子料理嘅方法處理過（我即刻諗起紅豆壽司)，將個湯打碎成泡，無咁膩喎..... 甜品佢地仲有鵝肝朱古力，周小姐唔小心食左一粒，個樣立即變晒。真係九唔搭八之最。令外又叫左好立克雪糕加honey comb。唔係好甜又好香麥味，個honey comb其實係D類似叮叮糖嘅野，總之無老點你係好食。

埋單幾貴﹐加上間野唔係特別靚﹐所以冇乜特別事應該唔會再去。



仲有間喺星街頭嘅沒名字的日式燒，好味到.... 尤其個燒魚頭!但我响openrice揾佢唔到。而家睇緊蔡瀾，佢連許留山都講呀救命。