nostalgic

這是非常 nostalgic 的一天。

因為陳奕迅一首＜一＞，我決意無論多昂貴，也要買回《天佑愛人》。我曾經擁有《天佑愛人》，但碟卻已經不在我手，只剩吉盒一個。原因不消提，大概每個戀人都有同樣經歷。當大家的焦點都在＜如果這一秒鐘你跟我講你不愛我＞及＜第五個現代化＞的時候，其實我覺得＜一＞比任何一隻歌都更滄海遺珠（雖然＜眼眉調＞也很好）。九九年覺得“這都市經已夠糟　糟不過早報的插圖　誰要扮憤怒”最入心，今年再聽，發覺“這都市經已夠好　好不過股票升兩毫”更入骨。

在188的二手店找到了，完整的要＄148，沒有紙盒的承惠＄88。紙盒我有，所以＄88就可以了。

神奇的事來了，二手店，有二手CD、VCD、DVD及唱片，和小量的LD。我個人又八掛，又鍾意洗埋晒D無謂錢，所以我雖有唱盤（及後醒起唱盤其實早給送走了）、DVD/VCD player及CD player，我卻走去揭那堆LD，因為我就是沒有LD player。一揭，死伙，周生！再細看，好彩，《西遊記》上下集一套只售＄18元正。想當年新藝城開倉，我買的《英雄本色》單碟也要＄50！還有《百變星君》，但此片可以不理。打蛇隨棍上，再問有沒有《迴魂夜》？有！＄1ＸＸ．．．老細見我猶豫，解釋說VCD都炒至＄2ＸＸ（我夠知喇），LD質素好過起格VCD，其實很抵買。我皺眉，老細終於識穿我：你有無LD player先？我見你要《西遊記》，以為你有呀，係呀，睇就好抵買，要黎儲就嘛嘛喇．．．0甘我下星期去鴨寮買返個LD player 0羅。

各位小朋友，你地見過LD未？
文物0黎，要學識好好保存，冇LD就冇VCD同DVD架喇知嘛。